تحت شعار أحلي قصصنا..الخير طول نجاة تحت شعار أحلي قصصنا نضيف ريهام متطوعه جمعية رسالة قصة جديدة تُضاف لرصيد رسالة الخيري والأخلاقي.
تحكي ريهام قصتها وتقول: هو الموقف مش ليا هو كان مع أصغر متطوعين في فرع أكتوبر خالد ومحمد إخواتي الصغيرين، أخويا محمد كان واقع على دراعه و اتكسر كسر شديد لدرجة أن المستشفيات ماكنتش راضيه تقبله لأنه كان فى عضمة النمو قالوا العملية صعبه جداً، والدكتور قبل ما يدخل العمليات قال لبابا بالنص: أنت توقع أن ابنك ممكن دراعه يفضل على الحجم دا.
ف بابا قال له : توكل على الله واعمل العملية. وقعدنا حوالي 60 يوم بعد العملية والحمد لله العمليه نجحت و محمد بقيت أنزله معايا رسالة من سنة وطول ما إحنا ماشين من البيت للفرع بقول له “خد نية أن ربنا شفاك وأن ربنا استجاب للدعاء و نجاك من العملية بسبب إن ممكن فى وقت ما كنت أنا بعمل خير فى مكان تاني وبساعد محتاج تاني أو بسبب دعاء بابا وماما”
وفي يوم كنا قاعدين وبنت عمتي سألت أخواتي و هم متطوعين في رسالة معايا “أنتم مش هتنزلوا مع ريهام يوم الجمعة الشغل؟ قالولها: شغل إيه!! قالتلهم :القافلة اللي بتروحوها قالولها : لا إحنا مش بنروح شغل أصلاً فبتقول لهم :اومال انتوا بتروحوا تعملوا إيه قالولها : إحنا بنروح نساعد الناس الغلابه إحنا مش بناخد فلوس قالتلهم: لا إنتوا بتاخدوا فلوس ومش عاوزين تقولوا فإخواتي زعلوا وقالولها: إحنا بنعمل عمل خير هو ينفع تصلي علشان تاخدي فلوس قالتلهم لا .. قالولها: واحنا كدا عمل الخير اللي بنروح نعمله مابناخدش عليه فلوس.