تحت شعار أحلي قصصنا ..جمعية رسالة لنشر الخير ومساعدة المحتاج

تحت شعار أحلي قصصنا يروي متطوعي جمعية رسالة قصة جديدة تُضاف لرصيد عطائها الإنساني.

يبدأ ربيع متطوع رسالة قصتك ويقول ؛ “أيام الإمتحانات الطلاب عندنا كانوا خارج الكلية أو بين المحاضرات بيصوروا المحاضرات من المكتبة فكل واحد بيكون معاه كم كبير من الأوراق والكتب، وكنا بنروح الجامعة الصبح قبل الإمتحان بساعتين، وبنسيب الكتب خارج لجنة الإمتحان ولما الطلبة كانت بتخلص وتخرج كانوا مابيخدوش الكتب أو الاوراق اللي سابوها و مبيدورش عليها،، فقررت بمساعدة دكتور عندنا في الكلية إننا نعمل حملة لجمع الورق للتبرع بيها في رسالة و كان كل واحد يجمع من أصحابه الورق اللي مش محتاجينه، فأنا كنت اطلع من الامتحان أجمع الورق كله وأشيله وأمشى وفي مرة العامل في الكلية وقفني لأن هو اللي كان بياخد الورق ويبيعه، فقولتله: الورق ده واخده اتبرع بيه في رسالة فالعامل لما عرف فتح لي المخزن و طلعلي نص شوال كتب وقاللي:اتبرع بيه، وأنا خارج بالورق الشباب كلهم لما شافوني ضحكوا وبقوا يقولوا دا رايح يبيعه لبتاع الطعمية أو لبتاع الهريسة.. فواحد صاحبي قال لهم: يا جدعان تعرفوا رسالة قالوا : آه قال لهم: اللي عنده كتب مش محتاجها يجيبها نتبرع بيها فبقيت ماشى اللي معاه حاجه بيحطها فمشيت أنا وصاحبي ومَلينا الشوال لآخره بالكتب واتبرعنا بيها.