تحت شعار أحلي قصصنا.. رسالة تُعلم معاني الحياة
تحت شعار أحلي قصصنا تضيف آية يونس متطوعة جمعية رسالة قصة جديدة تُضاف لرصيد عطاء جمعية رسالة المعنوي والإنساني .
بدأت قصتها وتقول “رسالة غيرت حياتي و علمتنى حاجات كتير أوي، كنت نازلة استكشاف لحالة عروسة، بس من كتر عياط الأم وبنتها مكنتش عارفة أعمل الاستكشاف وعرفت إن ظروفهم كانت كويسة جدا بس الدنيا تدهورت بيهم والبنت بقالها ٣ سنين مخطوبة ومش عارفة تتجوز ، ولأن اخوها توفي في الجيش البنت وأمها مبقاش ليهم اي حد يقدر يساعدهم.
بعد ماخلصت الاستكشاف بتلات أيام كلمت البنت تيجي تستلم جهازها وكانت فرحتها متتوصفش ، بعد الموقف ده بسنة قابلت نفس البنت في ميكروباص بس انا معرفتهاش بس هي بدأت تفكرني بيها وقالتلي جملة أثرت فيا وعمري مانسيتها لحد دلوقتي. إستكملت قصتها وقالت ” أنتِ السبب اللي سترتيني ربنا يسترك، الدعوة أثرت فيا و حسستني قد ايه إننا ممكن ننسي الخير اللي ساعدنا بيه حد بس هما عمرهم ماهينسونا.. شكراً رسالة حياتنا بيكي اتغيرت وعرفنا دورنا وواجبنا تجاه المحتاجين”.