تحت شعار أحلي قصصنا..فك الكرب بيسند وقت الشدة

تحت شعار أحلي قصصنا تروي متطوعة جمعية رسالة قصة جديد تُضاف لرصيد رسالة الإنساني والخيري. تحكي إيناس عبد الدايم قصتها وتقول ” الموقف كان في شهر رمضان الكريم، كان إعلان جروب أنا وابن عمي بنساعد الغريب على القنوات و كان في مساعدات كتيرة جداً الناس كانت محتاجها زي صرف أدوية، أو توفير أكل، أو توفير ملابس، وكان في ناس منهم محتاجة كتير و مش بيعرفوا يكتبوا بوست على الجروب ولا عندهم حد ينزلهم البوست دا، فأنا اتطوعت إنى أنزل بوستات الناس دى كلها على الجروب وكنت بتواصل مع حد مسئول في الجروب علشان يقبلوا الحالات المستعجلة جدا وينزلولهم بوست على الجروب، وفعلا كنا بنلاقي مساعدات وكان فى منهم ناس بتكلمنى على الرقم الشخصي و يأكدولي إنهم الحمدلله ربنا رزقهم بالأدوية والملابس وكل حاجة، ومن ضمنهم ست محتاجة دَعتلي دعوة حلوة جداً وقالتلى: ”

ربنا يوقفلك ولاد الحلال وميوقعكيش فى ضيقة ابدًا” بعد الكلام دا بأسبوعين حد غالي عليا دخل المستشفى و عمل عملية كبيرة وكان محتاج 5 أكياس دم ضروري، والأكياس تجهز الأول علشان يتحجز فى المستشفى والله أعلم العملية هتنجح ولا لا، فى أقل من ساعة فُرجت و جيه 5 متبرعين أنا مش عارفه الناس دى جت من فين والدم كله وصل فى ساعتها من ضمنهم متطوع من جمعيه رسالة من فريق إنقاذ حياة، طبعا الموضوع فرق معانا جدا في دخول العمليات بسرعة، و إحنا لو كنا عملنا إيه مكناش هنوفر أكياس الدم، بس أنا لما فكرت مع نفسي حسيت إن ربنا فَرجها بالسرعة دي بسبب دعوة الست البسيطة ليا و الحمدلله لحقنا المريض والعملية عديت على خير .