تحت شعار أحلي قصصنا ..”خيراً تعمل أجراً تلقي”تحت شعار أحلي قصصنا تضيف إيناس عقد الدايم متطوعة جمعية رسالة قصة جديدة تُضاف لرصيد عطاء جمعية رسالة المعنوي والإنساني .
تسرد إيناس قصتها وتقول ” كنا في رمضان كان بيدخلنا مساعدات كتير جدا وناس كتير محتاجة حاجات زي الدوا واللبس والأكل وكان في منهم كتير مش عارفين يكتبوا بوستات ويطلبوا مساعدات أو ينزلوا في جروب أنا وابن عمي بنساعد الغريب، وساعتها أنا تطوعت إنب أنزل بوستات المساعدات للناس دي وكنت بكلم المسئولين في الجروب هلشان يقبلوا البوستات بسرعة لأن كان في حالات فعلا مستعجلة ومينفعش تستني،
والحمدلله في ناس كتير قدرنا نساعدهم وكان كتير منهم بيتصلوا بيا يشكروني، وفي واحدة من الحالات اللي قدرنا نوفرلها المساعدة اللي محتاجاها كلمتني وشكرتني كتير جدا وفضلت تدعيلي وتقول ..ربنا يوفقلك ولاد الحلال ومتوقعيش في ضيقة أبدا” .
تستكمل قصتها وتقول “بعد الموقف ده بأسبوعين حد غالي عندي دخل المستشفي وعمل عملية كبيرة وكنا محتاجين 5 أكياس دم بسرعة جدا وفي أقل من خمس ساعات لقيت متطوعين مش عارفة جم منين موجودين وإتبرعوا بالدم وفعلا وفرنا أكياس الدم ومن المتطوعين دول واحد من فريق إنقاذ حياة، ساعتها حسيت إن دعوة الست دي هي السبب بعد ربنا في إنقاذ أهلي، وإن الخير اللي بعمله هيتردلي في أكتر وقت أنا محتاجاه فيه، و شكرا رسالة اللي كانت سبب إني أقدر أساعد ناس كتير محتاجة.