تحت شعار أحلي قصصنا..الرسالاوي مصدر ثقة

تحت شعار أحلي قصصنا تروي متطوعة جمعية رسالة قصة جديدة.

تقول متطوعة جمعية رسالة " الرسالاوي دايماً مبادر في الخير ومساعدة الغير والنهاردة متطوعتنا بتحكيلنا عن موقف خير حصلها وبتقولنا مره كنت رايحه الدرس بتاعى ولابسه تيشيرت رسالة وفي الطريق بتاع مايو الاوتوستراد فى عربيات مبتقفش فأنا مينعفش اعدى لوحدى على الناحية التانيه من الطريق كان فى ست كبيره وشايله حاجات ففكرت أروح اساعدها بس

صحابى مرضيوش ينزلوا فروحت عشان أشيل معاها فزقتنى من على الرصيف ومرضيتش تدينى الشنط فزمايلى من بعيد شاورلي إني أرجع ليهم تاني فخدت بالي انها حاولت تشيل الشنط تاني لوحدها مقدرتش تشيلها فطلعتلها تانى على الرصيف جيت أخد منها الحاجه تانى فشدتنى من البروليه اللى كنت لابساه فشافت اسم رسالة قالتلى انتى من رسالة قولتلها اه

قالتلى طب ساعدتينى ليه مع إنى عاملتك وحش قولتلها لانى لاقيتك محتاجة مساعدتي أول ما عرفت انى من رسالة ادتنى المحفظة والموبايل وسابتلى الحاجه وراحت تكمل شرا ولما رجعت طلبت مني اساعدها واعديها الشارع بعدها بفتره واحنا خارجين من المدرسة صحابي شافوا ست من أول الطريق هى جاية من بعيد وشايله حاجات في لحظة لقيت صحابي راحوا يساعدوها لدرجة انهم سبقوني

فحسيت إن الموقف اللي أنا عملته هو السبب في تغيير فكرة صحابي شكراً رسالة انك علمتينا نساعد غيرنا من غير تفكير.